Dare repamusoro soro neChitatu rakarasa nyaya ina dzange dzakwidzwa kudare iri dzevanhu vange vachipomerwa mhosva yekutuka mutungamiri wenyika, VaRobert Mugabe.
Imwe yenyaya idzi ndeyekunyomba VaMugabe vachinzi chikwambo.
Asi dare iri rati vakuru vezvematongerwo enyika vanonyombana nekudaro nyaya dzekunyombana hadzisi nyaya dzingauyiswe kumatare, kana kusungisana.
Asi mutemo weCriminal Law Codification and Reform Act section 31 unoti imhosva kutuka mutungamiri wenyika sezvo kunenge kuri kumuzvidza nekumuninipisa.
Dare reConstitutional Court gore rapera rainge rati mutemo uyu ubviswe asi rikapa gurukota rezvemutemo vari mutevedzeri wemutungamiri wenyika, VaEmmerson Mnangagwa, mukana wekupikisa.
Vamwe vange vari kudare inhengo mbiri dzeMDC-T kusanganisira munyori mukuru webato iri, VaDouglas Mwonzora, avo vange vachipomerwa mhosva yekuti vainge vati VaMugabe chikwambo.
Mumwe murume akaendeswa kudare achinzi ainge anyomba VaMugabe pa whatsapp nekutumira mifananidzo yaVaMugabe yekunyomba vasina kusimira.
Asi vatongi vose vedare reConstitutional Court vachitungamirwa nemutongi mukuru, VaGodfrey Chidyausiku, rarasa nyaya dzose idzi rikasimbisa kuti kunyombana munyaya dzezvematongerwo enyika chigariro uye handi mhosva.
Vapawo muenzaniso wezviri kuitika muZanu-PF zvekuti vamwe vari kunzi zvipfukuto vamwe vachinzi “gamatox” vakati handi nyaya dzavanotarisira kuti dziunzwe kudare sezvo kuri kupedzera hoko padehwe retsindi.
Gweta rinorwira kodzero dzevanhu richishanda neZimbabwe Lawyers for Human Rights, VaDzimbabwe Chimbga, vanoti vanowirirana nemitongo yaturwa nedare.
Zvichakadaro, mutongi mukuru wedare repamusoro, VaNovember Mtshiya, vati vachanzwa neChina nyaya yakakwidzwa kudare iri nevagari vepapurazi reManzou kuMazowe vachiti havasi kufara nekuiswa kwembizi papurazi iri. VaMtshiya vati vari kuda kumbozeya mapepa ose akaturwa kudare.
Vakaendeswa kumatare nevarimi vepaManzou igurukota rezvezviwanikwa, gurukota remukati menyika, gurukota reminda uye bazi reZIMPARKS. Vose ava vanonzi vari kuzvidza dare rakati vanhu ava vasadzingwe papurazi vasati vawanirwa kwekuenda.