Dunhu reMDC T reHarare neChitatu rakadoma munyori wezvekurongwa kwemisangano, VaNelson Chamisa, kuti vatore chigaro chemunyori mukuru webato pasarudzo dzichaitwa pamusangano wekongiresi yebato iri mukupera kwemwedzi unouya.
Amai Paurina Mpariwa-Gwanyanya ndivo vakadomwa kuva mutevedzeri wemunyori mukuru.
Vakambenge vadomwa kuti vave munyori mukuru webato pasarudzo dzekutanga dzinonzi dzakazoita mutauro ndaVaDouglas Mwonzora, vanove mutauriri webato iri pari zvino.
Pasarudzo dzemusi weChitatu idzi VaMwonzora vakanzi varambe vari mutauriri webato vachitevedzerwa naMuzvare Thabitha Khumalo.
Asi VaMwonzora vanoti havana kugutsikana nemaitirwo akazoitwa sarudzo idzi, idzo dzakaona vachidomwa semutauriri, vachiti dzakaitwa ivo vasipo vari kwaRusape kwavari kutongwa nemhosva yekukonzera mhirizhonga muna 2011.
VaMwonzora vanoti kuitwa kwesarudzo panguva yavaive kumatare kwakavashaisa mukana wekutsvaga rutsigiro kana kuzvishambadza kudunhu reHarare.
Asi vanoti senhengo yebato ine chido chekushandira musangano wayo, vari kutambira zvakabuda musarudzo idzi. Vanoti vachaedza kutsvaga rutsigiro kubva kune matunhu gumi asara.
Vamwe vakadomwa ndaVaAmos Chibaya kuti vave munyori anoona nezvekurongwa kwemisangano, vachitevedzerwa naVaAbednico Bhebhe.
Mutungamiri webato, VaMorgan Tsvangirai, nemutevedzeri wavo, Muzvare Thokozani Khupe, nasachigaro webato, VaLovemore Moyo, nemutevedzeri wavo, VaMorgen Komichi, vakadzoserwa vakadaro.
Munyori anoona nezvekurongwa kwemisangano, VaNelson Chamisa, vanoti kuvepo kana kusavepo kwaVaMwonzora kana ivo pachavo VaChamisa kwakanga kusina musiyano sezvo vanhu vaidomwa nehutungamiri hwedunhu chete, vasingabvumidzwi kutsvaga rutsigiro.
Dunhu reChitungwiza rakadomawo VaChamisa kuti vatore chigaro chemunyori mukuru, VaMwonzora richiti varambe vari kudivi rekuburitswa kwemashoko rinove ravari iye zvino.
VaTsvangirai naMuzvare Khupe vakadomwawo neChitungwiza.
Zvichakadaro, VaMwonzora nevamwe vavo makumi maviri vavari kutongwa navo nemhosva yekukonzeresa mhirizhonga muna 2011, vanzi vagozodzoka kudare rekwaRusape musi wa2 Gumiguru.
